De gran repercusión na vida sociocultural da cidade, situada nunha das rúas máis sobranceiras do casco histórico compostelán. Ademais de ser un dos principais colaboradores dos grandes eventos da cidade, as súas actividades destacan pola organización de exposicións de nivel internacional -Frida Kahlo, Chillida ou as obras do museo Thyssen-Bornemisza, etc.-, ciclo de cine e conferencias, entre outros.

O Centro Cultural Afundación en Santiago de Compostela encóntrase na emblemática rúa do Vilar, situada na zona antiga. Esta edificación, incluída no Catálogo de Protección do Patrimonio Construído de Interese Cultural, pertenceu ao cabido compostelán entre os séculos XV e XIX, sendo xa por aquel entón unha construción ben apreciada por acoller no seu interior un pozo que alimentaba as fontes públicas da cidade. Así, foi nomeada dende tempo atrás como a Casa Grande do Pozo ou do Cabido.

Na rehabilitación, extremadamente coidadosa coa estrutura orixinal, fíxose fincapé naqueles elementos preexistentes que facían da casa un espazo singular, como o pozo, que se constitúe como peza determinante do conxunto arquitectónico. No contorno deste resalta un eixe central que atravesa verticalmente o interior da casa na procura de luminosidade para os 1.755 metros cadrados dos que dispón, e que se distribúen nun total de catro plantas e baixo-cuberta.

Na planta baixa encóntrase o salón de actos que conxuga modernidade e tradición, mostrando unha estética pouco convencional, o que tamén podemos percibir na sala de exposicións contigua. Por outro lado, as plantas primeira e segunda resérvanse ademais para mostras, mentres que a terceira e a baixo-cuberta están dedicadas ao Fondo Bibliográfico Histórico de Afundación, un importante tesouro, referencia inescusable de especialización e consulta.

A Casa Grande do Pozo levántase hoxe como símbolo cultural da vella cidade, cativando cun gran valor histórico e etnográfico.

Horarios de apertura

Todos os días (domingos e festivos incluídos): 12.00-14.00, 17.00-21.00 h.

Pechado os domingos e festivos do mes de xullo e agosto.

Historia compostelana

Ordenar por

Filtrar por sección